A Desputisoun bitvene þe bodi and þe soule
001 Als y lay in a winters niȝt,
002 In a droupening bifor þe day,
003 Me þouȝt y seiȝe a selli siȝt:
004 A bodi opon a bere lay,
005 He hadde ben a modi kniȝt,
006 & litel serued god to pay;
007 Forlorn he had his liues liȝt,
008 Þe gost moued out & wald oway.
009 ¶ When þe gost it schuld go,
010 It biwent & wiþstode,
011 Biheld þe bodi þat it com fro,
012 Wiþ reweful chere & dreri mode;
013 & sayd, "Allas & walewo!
014 Þou fikel flesche, þou fale blod;
015 Whi liistow stinking so,
016 Þat whilom was so wilde & wode?
017 ¶ "Þou þat were y-wont to ride
018 So fair on hors, in & out;
019 A queint kniȝt y-kid ful wide
020 Als a lioun, fers & prout,
021 Wher is now þi michel pride
022 & þi lede þat was so loude?
023 Whi liistow now so bare of side,
024 Ypricked in a pouer schroude?
025 ¶ "Whare ben al þine worþliche wede,
026 Þine somers wiþ þine riche bed;
027 Þi proude palfrais, & þi stede,
028 Þat þou about in destrer led;
029 Þine haukes þat were won to grede,
030 & þine grehoundes þat þou fed?
031 Me þenke þine be ful gnede,
032 Now alle þine frendes be fro þe fled.
033 ¶ "Whar ben þine markes, & þine poundes
034 Þi folk, & þi fair fyȝe,
035 Þi riche tresour, bi rof & grounde,
036 Þi briȝt broches ring & beiȝe?
037 Who durst þe bede stroke or wounde
038 When þi baner was rered on heiȝe?
039 Vuel artow proued in a stounde;
040 Þi tayl is cutted þe ful neiȝe.
041 ¶ "Whare be þine cokes snelle,
042 Þat schuld go to grayþe þi mete
043 Wiþ swot spices for to smelle,
044 Þat þou were neuer ful to frete,
045 To make þi foule flesche to swelle,
046 Þat wilde wormes schal now ete?
047 & ich haue þe peyne of helle
048 Þurth þi glotonie ygete.
049 ¶ "Whare be þine castels & þine tours,
050 Þine chaumbers, & þine heiȝe halle,
051 Þat paynted were wiþ prout flours,
052 & þine riche robes alle?
053 Þine quiltes, & þi couertours,
054 Þi cendel, & þi purpel palle?
055 Wreche! Ful derk it is þi bour
056 Te morn þou schalt þerin falle.
057 ¶ "Whare be þine glewemen þat schuld þe glewe
058 Wiþ harp & fiþel & tabour bete?
059 Trumpours þat þine trumpes blewe,
060 Hem þou ȝeue ȝiftes grete,
061 Riche robes, held & newe,
062 For to glewe þe þer þou sete;
063 Tregettours þat were vntrewe,
064 Of þe hye hadde grete biȝete?
065 ¶ "For to bere þi word ful wide,
066 & maky of þe rime & raf,
067 Riche men, for pamp & pride,
068 Largeliche of þine þou ȝaf.
069 Þe pouer ȝede al biside,
070 Euer þou hem ouerhaf,
071 & ȝif þai com in þine vnride,
072 Þai were ystriken wiþ a staf.
073 ¶ "Of þe pouer, þou it nam,
074 Þat mani a glotoun ete & drank;
075 Þou no rouȝtest neuer of wham
076 No who þerfore sore swank;
077 Þe riche was welcom þer he cam,
078 Þe pouer was beten þat he stank.
079 Now alle is gon in godes gram,
080 & Þou hast wreche litel þank.
081 ¶ "Tomorwe anon as it is day,
082 Out of kiþ fram alle þine kin,
083 Alle bare þou schalt wende oway
084 & leuen al þine warldes winne.
085 Fram þe palays þat þou in lay,
086 Wiþ wormes is now y-taken þin in;
087 Þi bour is bilt wel cold in clay,
088 Þe rof schal take to þi chin.
089 ¶ "Þou þat neuer in alle þi liue
090 Of þis warldes mock miȝtest be sad,
091 Now schaltow haue at al þi siþe
092 Bot seuen fet vnneþe þat;
093 Þou miȝt y-se þe soþe & kiþe,
094 Þat al is lorn þat þou biȝat,
095 No schaltow neuer make þe bliþe
096 Þer oþer men schal make hem glad.
097 ¶ "Of alle þat þou togiders drouȝ,
098 Þou were harder þan þe flint,
099 Swiche schal make him large anouȝ,
100 Þat þou wel litel haddest y-mint;
101 Þou þat madest it so touȝ,
102 Al þi bobaunce is now y-stint.
103 Ich may wepe þat þou bilouȝ,
104 For al mi ioie for þe is tint.
105 ¶ "Þi fals air schal be ful fain,
106 Þi fair fe to vnderfo,
107 Now wele is him þis day y-sein,
108 Þat litel gode schal for ous do;
109 He no wold nouȝt ȝiue oȝain,
110 To bring ous into rest & ro,
111 Of alle þi lond an acre or tvain,
112 Þat þou so sinfuly com to.
113 ¶ "Þi wiif no wil no more wepe
114 To niȝt no miȝt he haue no rest,
115 No for fele þouȝtes slepe,
116 To wite what maner miȝt be best
117 In þi stede for to crepe,
118 Bi þis hye wot anoþer al prest;
119 Be þou be to morwen doluen depe,
120 Anon þai schal be trewþe fest.
121 ¶ "Now schul þine sekatours seck,
122 Al þi gode when þou art ded,
123 Al togider schal go to wrek,
124 Haue men deled a litel bred;
125 Ich man pike what he may skek,
126 Hors, & swine, schepe, & net,
127 Gold & siluer daþet who rec,
128 Ne be we boþe bitauȝt þe qued.
129 ¶ "Now may þine neiȝbours liue,
130 Wreche, þatow hast wo y-wrouȝt;
131 Þou stintest neuer wiþ hem to striue,
132 Til þai were to pouert brouȝt.
133 He was þi frende þat wald þe ȝiue,
134 & þi fo þat ȝaf þe nouȝt.
135 Þe curs is comen þat now wil cliue,
136 Þat mani a man haþ þe bisouȝt.
137 ¶ "Now beþ þe bedes on þe liȝt,
138 Wreche, þer y se þe lie,
139 Þat mani a man bad day & niȝt,
140 & lay on her knes to crie.
141 Allas, þat ich wreched wiȝt,
142 Schal so gilteles abie,
143 Þine misdeeds, & þine vntiȝt,
144 & for þe hard paines drie."
Corpus respondit anime
145 ¶ When þe gost wiþ reweful chere
146 Hadde y-maked þis michel mone,
147 Þe bodi þer it lay on bere,
148 A gastlich þing as it was on,
149 Lift vp his heued opon þe swere,
150 As it were sike, it gan to gron,
151 & seyd, "Wheþer þou art mi fere,
152 Mi gost þat is fro me gon?"
153 ¶ It seyd, "Wheþer þou be mi gast
154 Þat me abreidest of min vnhap?
155 Vncomli me þouȝt min hert brast,
156 When deþ so diolfuli me drap.
157 Y nam þe first no worþ þe last
158 Þat haþ y-drouken of þat nap,
159 Nis non so kene þat he is cast,
160 Þe prodest arst may kepe his clap.
161 ¶ "Wele y wot þat y schal rote;
162 So dede Alisaunder & Cesar,
163 Þat no man miȝt of hem finde a mot,
164 No of þe moder þat hem bar.
165 Wirmes ete her white þrote,
166 So schal mine wele am y war.
167 When deþ so scharpliche schet his schot,
168 Þer nis non oȝain char.
169 ¶ "Þer y seiȝe boþe clerk & kniȝt,
170 & old man bi gates go,
171 Y was a ȝong man & liȝt,
172 & euer wende to liui so.
173 Halles heiȝe & bours briȝt,
174 Y hadde y-bilt & mirþes mo,
175 Mi woning here wel wele y-diȝt,
176 & now deþ haþ me dempt þerfro.
177 ¶ "Mi woning here wel worþli wrouȝt,
178 & wende to liui ȝeres fele,
179 Wodes wones, watres y-bouȝt,
180 Wiþ al þat ich miȝt pike & spele;
181 Þe world is torned to ȝain mi þouȝt,
182 When deþ, þat stilly can stele,
183 & haþ me dempt oway wiþ nouȝt,
184 & oþer welden alle mi wele.
185 ¶ "Soule, ȝif ȝon it me wilt at wite,
186 Þat we schul be boþe y-spilt,
187 ȝif þou hast schame & gret despite,
188 Al it is þine owhen gilt;
189 Y þe say at wordes lite,
190 Wiþ riȝt resoun ȝif þatow wilt,
191 Þou berst þe blame & y go quite
192 Þou scholdest fram schame ous haue y-schilt.
193 ¶ "For god þe schope after his schaft
194 & ȝaf þe boþe wit & skille,
195 In þi lokeing y was laft
196 To wissi after þine owhen wille.
197 I no couþe neuer of wichecraft,
198 No wist what was gode no ille,
199 Bot as a bodi doumbe & daft
200 & hou tauȝtest me þertille.
201 ¶ "Seþþen y was tauȝt þe to ȝeme
202 A witteles best as y was born,
203 & for to serui þe to queme,
204 Boþe an euen & eke a morn;
205 Þou þat couþest do mes deme,
206 Þou schult haue ben war biforn,
207 Of me, soule, þou haddest to ȝeme,
208 Wite þiself þou art forlorn."
Iterum anima corpori
209 ¶ Þe soule seyd, "Bodi, be stille!
210 Who hast þe lerned al þis witt,
211 Þou castest me þis wordes grille,
212 & list y-bollen as a bit?
213 What wenestow, wreche, þei þou fille
214 Wiþ þi foule flesche a pit,
215 Of al þine dedes þou hast don ille,
216 Þat þou so liȝteliche schal go quit.
217 ¶ "What wenestow, wreche, to gete griþ,
218 Þei þou lege loken in clay,
219 & þei þou roti pil & piþ,
220 & blowe wiþ þe winde oway?
221 ȝete þou schalt com, lim & liþ,
222 Oȝain to me at domesday,
223 Stond at court & y þe wiþ
224 To kepe þere our hard pay.
225 ¶ "For in þi lokeing y was laft
226 For to do astow me bede,
227 Þe bridel wiþ þe teþ þou lauȝt,
228 & dedest ay oȝain mi red;
229 To schame & sorwe it was þi drauȝt
230 To vilanie & wicked hed,
231 ȝern y chidde & wiþ þe fauȝt,
232 & euer þou toke þine owhen red.
233 ¶ "Y bad þe þenke in soule nedes,
234 Messes, matines, & euensong;
235 Þou seyd þou most don oþer dedes,
236 For þat was ydel mannes gong.
237 To wode or to feld þou ȝedest,
238 Or to court to deme wrong,
239 Bot for pride or gret medes,
240 Litel gode þou dest among.
241 ¶ "Who may more tresonn do,
242 Or his lord better bigiue,
243 Þan he þat al his trist is to,
244 & is wiþ him as owhen hyne?
245 Þo þat þou were þriuen & þro
246 & knewen al werkes mine,
247 Þi selue þou puruaidest rest & ro,
248 & damnedest me to helle pine.
249 ¶ "Now may wilde bestes ren,
250 & woni vnder linde & lef,
251 Foules fle bi feld & fen,
252 Seþþen þi wreched hert clef.
253 Þine eiȝen er blinde & may nouȝt kenne;
254 Þi mouþe is doumbe, þin er is def;
255 & loþly list on me to grenne.
257 ¶ "Þar nis no leuedi, briȝt of ble,
258 Þat wele was wont of þe to lete,
259 Þat o niȝt wald ly bi þe,
260 For þing þou miȝtest hir bihete.
261 Þou art vnsemly for to se,
262 Vncomly for to kis swete.
263 Þou no hast no frende þat nil þe fle,
264 & þou com starteling in þe strete."
Corpus respondit anime
265 ¶ Þan þe bodi bigan to say,
266 "Soule þou hast wrong y wis,
267 Al þi gilt on me to lay
268 Þat þou hast lorn heuen blis.
269 Whar was y bi wode or way,
270 Sat, or stode, or dede ouȝt mis
271 Þat y no was euer vnder þine ay?
272 Wele þou wost & soþe it is.
273 ¶ "Or whare ȝede ich vp & doun,
274 Þat y no bare þe at mi bac
275 & was þine hors fram toun to toun,
276 At eueri stede y-make þe mak.
277 Ful wele þou wistest of mi roun,
278 What ich dede or what y spac,
279 Bi skil þou art y-brouȝt adoun,
280 & y-go quite wiþouten lac.
281 ¶ "For al þe while þou was mi fere,
282 Ich hadde alle þat me was nede;
283 Ich miȝt y-se, speke, & here,
284 ȝede & rode, drank & ete.
285 Loþliche ischaunched is mi chere
286 Seþþen þe time þat þou me lete;
287 Def and doumbe y ligge on bere,
288 Y no may stir hond no fet."
Iterum anima corpori
289 Þe soule seyd, "It is no dout
290 About bodi þou me bare,
291 Þou mostest nedes þou were wiþout
292 Hond & fot & were al war;
293 Bot astow bar me about,
294 Y no miȝt nouȝt do þe lest char,
295 Þerfore mot ich nedes stoupe,
296 So doþ he þat oþer no dar.
297 ¶ "In a woman were we bred
298 & born togiders boþe to,
299 & on o barm forsterd & fed,
300 Ay til þou couþe speke & go;
301 For loue softliche y þe led,
302 No durst y neuer do þe wo;
303 To lese þe y was for dred,
304 Y nist whare to gete mo.
305 ¶ "Y seiȝe þe fair of flesche & blod,
306 Al mi loue on þe y cast,
307 Þatow me brewe me þouȝt gode,
308 & lete þe haue ro & rest;
309 Þat made þe wel stern of mod,
310 & of dedes wel vnwrast,
311 To wer wiþ þe was me no bot,
312 Þou bar me opon þi brest.
313 ¶ "Glotonie & Licherie,
314 Pride & hat & coueytise,
315 Niþe & ond & envie,
316 Oȝaines god & alle hise
317 In þat lustes for to lye,
318 Whas þi won in al wise;
319 Þat schal y wel dere abye,
320 No wonder þei me sore agrise.
321 ¶ "Oft we were togiders þrat
322 What we schuld boþe haue,
323 Litel hede tok þou of þat,
324 When þou seiȝe ded men in graue;
325 Þou dest al þat þe warld þe bad,
326 & þat þi foule flesche wold craue,
327 & y þe suffred & dede as mad;
328 Þou to be maister & y þi knaue.
329 ¶ "Þou þat were so worþly wrouȝt,
330 Þou seyst y maked þe mi þral;
331 Al þat euer þe of rouȝt,
332 Þou it dest & y forhal;
333 & y no misdede neuer nouȝt,
334 No y no rast, no y no stal,
335 Of þe com euer þe first þouȝt,
336 A bigge who so bigge schal.
337 ¶ "Ac haddestow so Crist it ouþe,
338 ȝif me hunger, þrost, & cold,
339 & chasted me þat no gode no couþe,
340 To bismar when þat y was bold;
341 Swiche as y lerd in mi ȝouþe,
342 Ich vsed when þat y was old,
343 & went at wil norþ & souþe,
344 & lete þe haue þi wil at wold.
345 ¶ "To sinne þou wist it was mi kinde,
346 As al mankinde is also,
347 & be þis wreche worl minde,
348 & euer couayt mo & mo.
349 Þou schust hane leten me fast binde
350 When y to sinne wold haue go,
351 Þot when þe blinde lat þe blinde,
352 In diche þai falle boþe to."
353 ¶ Þan þe soule bigan to wepe,
354 & seid, "Bodi, Allas! Allas
355 Þat ich euer seiȝe þe ȝete,
356 For al mi loue on þe y las;
357 As þou loue best me þou lete,
358 & madest me an houne of glas,
359 & y dede þat þe þouȝt swete,
360 & þou mi traitour euer was.
361 ¶ "When y bad þe schrift take,
362 & lete þine sinnes ay & o,
363 Do penaunce fast & wake,
364 Þe fende seyd, 'Þou schalt nouȝt so.
365 So ȝong þi riot to forsake
366 & euer to liue in sorwe & wo.'
367 He bad þe ioie & mirþe make
368 & þenke to liue ȝeres mo.
369 ¶ "& when y bad þe arliche arise
370 & nimen of þi soule kepe,
371 Þou seydest þou no miȝtest in non wise,
372 For þi miri morweslepe;
373 When ȝe þre hadde sett ȝour asise,
374 No wonder þei y sore wepe,
375 ȝe ladde me bi ȝour enprise
376 As þe bucher doþ þe schepe.
377 ¶ "& when y bad þe lete pride
378 Þat þou no bere þe nouȝt so stout,
379 Þe foule fende was þe bi side
380 & bad þou schust be fers & proude,
381 & weri riche robes wide,
382 & nouȝt as a begger in a clout,
383 & on heiȝe hors ride
384 Wiþ fair meine in & out.
385 ¶ "When þou hast y-told þi fals tale,
386 Ay þou were oȝain me forsworn,
387 Al þou held tretefale
388 Þat men told þe biforn;
389 ȝe ladde me bi doun & dale,
390 As men doþ ox bi þi horn,
391 Þer him schal be browe his bale,
392 Þat his þrote schal be forsworn.
393 ¶ "Ac ȝiue ichadde ben a nete,
394 Oþer a schepe, oþer a swine,
395 Þat ȝede about & drank & ete
396 & were y-slawe & passed pine,
397 Þan hadde ich neuer y-taken kepe
398 No knowe þat ale fram þe wine,
399 Þan hadde ich neuer com in helle depe,
400 Nouþe at mi last fine.
401 ¶ "Ac þei alle men vnder mone,
402 Ous to deme were sett on benche,
403 On of þe paines ous schal be done,
404 Þe lest peine no miȝt biþenche;
405 No helpes ous non bede no bone,
406 No may we non wiles wrenche,
407 Hellehoundes com sone,
408 & y no may nouȝt fram hem blenche."
Corpus respondit anime
409 And when þi bodi seiȝe þe gast,
410 Þis wo & þis mone make,
411 "Allas," it seyd. "Mi loue y-last,
412 Þat y haue loued for þi sake;
413 Þat min hert no hadde y-brast,
414 When y was fro mi moder take,
415 & seþþen into a pit y-cast
416 Vnto an adder or to a snake.
417 ¶ Þan hadde ich neuer y-lerned
418 What was iuel no what was gode,
419 No of þis warldes mok ȝerned,
420 No paines þoly as y now mot.
421 ¶ Owe wher no seynt no may bere our ernd
422 To him þat bouȝt ous wiþ his blod,
423 In hellefire ar we be forbernd,
424 Of sum prayer may don ous bot."
Iterum anima corpori
425 "Nay bodi, nay! Now is to lat
426 For to pray or for to preche.
427 Now þe wain is atte ȝat,
428 & þe tong haþ lorn his speche.
429 O point of our payn to abat
430 In alle þe warld nis no leche;
431 Ac sikerliche we goþ o gat,
432 Swiche is godes hard wreche.
433 ¶ "Ac haddestow a litel ere,
434 While ous was togider liif y-lent,
435 When þou feldest þe sike & sere,
436 Haue schriuen þe & þe fende y-schent,
437 & haue y-late a reweful tere,
438 & bisouȝt Ihesu of amendement;
439 Þe þortest neuer haue had fere
440 Þat he no wold ous grace haue sent.
441 ¶ "Ac þei alle þe men þat beþ aliue
442 Were prestes, messe for to sing,
443 & alle widowes & alle wiue
444 Her hondes for þe wold wring,
445 No miȝt telle þe paines riue,
446 For soþe y-seyd wiþouten lesing,
447 Seþþen we no miȝt ous for schame schriue,
448 Þat schuld ous now to ioie bring.
449 ¶ "Bodi, y may no lenger duelle
450 To stond for to speke wiþ þe.
451 Hellehoundes here ich ȝelle,
452 & fendes mo þan y may se
453 To com to feche me to helle,
454 & y not whider y may fle;
455 & þou schalt com wiþ flesche & felle
456 At domesday & speke wiþe me."
457 ¶ Hadde he no raþer þis word y-seyd,
458 It wist neuer whider to go,
459 It was y-hent in a brayd
460 Wiþ a þousand fendes & ȝete mo;
461 ¶ & when þai hadde on him y-layd
462 Her scharpe hokes al þo,
463 It was in a sori playd
464 Y-toiled boþ to & fro.
465 Sum were rogged & rowe tayled
466 Wiþ brode boches on her bak,
467 Scharpe clawed & long nailed,
468 Nas no lim wiþouten lak.
469 Rewefully he was aseyled
470 Wiþ mani a fende, blo & blak;
471 Merci he crid & litel vailed,
472 When god wald take his hard wrak.
473 ¶ Sum þe chauel al toþrast,
474 & ȝoten in þe led al hot
475 & bad he schuld drink fast,
476 & birly about al o brod.
477 A fende þer com atte last,
478 Maister he was ful wele y wot;
479 A colter glowend on him he cast,
480 Þat þurth þe hert þe point it smot.
481 ¶ Glaiues glowend to him þai sett,
482 To bac, to brest, in ich a side,
483 Þat at þe hert þe pointes mett
484 & made him woundes depe & wide,
485 & þan þai asked hou þat helet,
486 His hert þat was ful of pride,
487 ȝif he hadde ani þing þat him hett
488 More schame him schuld bitide.
489 ¶ Worþliche wede for to were,
490 Þai seyd þat he loued best,
491 An heui brim for to bere
492 Al glowend on him þai best
493 Wiþ hot claspes for to spere,
494 Þat fast sat to bac & brest,
495 & hiled al his oþer gere,
496 A stede him com al so prest.
497 ¶ Þe stede was bridled wiþ a bridel,
498 A curssed deuel as a cot,
499 Þat loude grad & ȝened wide,
500 Þe blo fire her fleiȝe out at his þrote;
501 In a sadel vp to þe midside,
502 Ful of scharp pikes y schote,
503 As an hechel on to ride,
504 Hal was gloweand eueri grot.
505 ¶ In þe sadel he was y-slong
506 As he schuld to þe turnament;
507 A þousand fendes on him dong
508 & al to peces him torent.
509 At eueri dint þe spark outsprong,
510 As a brond þat were forbrent,
511 Wiþ hote speres he was y-stong
512 & wiþ her hokes al torent.
513 ¶ & when he hadde ridden þat foule rode,
514 In þe sadel þer he was sett,
515 Þai slong him doun als a tode,
516 & hellehoundes to him lett
517 & breyd of him þe peces brode;
518 Wel dolefulliche he was y-gret,
519 Þer þe foule fendes glode,
520 O blod men miȝt folwe þe tred.
521 Þai bede he schuld hunti & blowe
522 ¶ & clepe forþ Bausan & bewe
523 His raches him were won to knowe,
524 He schuld sone blowe þe priis;
525 An hundred fendes on a rowe
526 Forþ him driue, maungre his,
527 Til he com to þat loþli lowe:
528 Helle, y wot, y-cleped it is.
529 ¶ When he com to þat foule won,
530 Þe fendes casten vp a ȝelle;
531 Þe erþe opened & tochon,
532 Smok & smorþer þer out welle,
533 Of wild fir & of bronston
534 Seuen mile men miȝt haue þe smelle.
535 Wel wo is þe soule bigon,
536 Þat schal suffri þat tende del.
537 ¶ & when þe soule þis siȝt y-seiȝe
538 Whider it schuld, it cast a crie
539 & seyd, "Ihesu þat art on heiȝe,
540 & on þi schaft þou haue mercie.
541 Þou madest me þat art so sleiȝe,
542 Þi creatour so was y
543 As oþer mani þat beþ þe neiȝe,
544 Þat þou so wele hast don by.
545 ¶ "Þou þat wistest al bifore,
546 Whi madest þou me to wroþer hele,
547 To be to-togged & to-tore,
548 An oþer to welden al mi wele?
549 Þo wreches þou woldest haue forlore,
550 Wele miȝtestow hem hadde y-spele,
551 Þat þai no had neuer be bore,
552 To ȝiue þe ….
553 Þan bi go …
554 Caitif no …
555 To crie to …
556 No for to c…
557 Þou hast f…
558 Þou hast y…
559 & þat schalt…
560 & al þat le…
561 ¶ Þe foule fend…
562 Bi top & tay…
563 & slonggen i…
564 Doun in to …
565 Þer neuer s….
566 Hemself þa…
567 Þe erþe ano…
568 Anon þe don…
569 ¶ When it wa…
570 In helle it …
571 On heueri…
572 Opon þe b
573 To Ihesu Cr…
574 Oft he cr…
575 For fere…
576 Com to…
577 ¶ Y þonki…
578 His mic…
579 Þat sar…
580 A sinful …
581 Þo þat…
582 Do schri….
583 Nas ne…
584 Þat go….
585 ¶ Ihesu þa…
586 & schope …
587 & wiþ…
588 Of ame…
589 Þine …
590 In heu…
591 Þi pass…